FAST գլոբալ նորարարական համաժողովում գործարար և «Ավրորա» մարդասիրական նախաձեռնության համահիմնադիր Նուբար Աֆեյանը հայտարարել է, որ Հայաստանը պետք է ձգտի ստեղծել սեփական արհեստական բանականությունը:
Նա նշել է, որ ներկա պայմաններում տեխնոլոգիաների մասին խոսելը դժվար է. պետությունը բախվում է գոյության սպառնալիքների, սահմանափակ ռեսուրսների, թույլ տնտեսության և տարածաշրջանային բարձր անկայունության հետ։ Սակայն, նրա խոսքով, հենց նման մարտահրավերներն են ստիպում կենտրոնանալ և զարգացման նոր ձևեր փնտրել:
Աֆեյանն ընդգծել է, որ աշխարհն ապրում է աննախադեպ ճնշման շրջան. պատերազմները, համաճարակները, տեղեկատվական մանիպուլյացիաները և կլիմայի փոփոխությունները ձևավորում են գլոբալ օրակարգը։ Միևնույն ժամանակ, առաջիկա տասնամյակներում մարդկության վրա առանցքային ազդեցություն կունենա կենսաբանությունը, որն առաջին անգամ սերտորեն կապված է հաշվողական տեխնոլոգիաների հետ։ Նա դա անվանել է եզակի շրջադարձային պահ, որը հնարավորություններ է բացում նորարարությունների համար:
Աֆեյանի խոսքով՝ ապագային չի կարելի վախով դիմավորել։ Երկրին անհրաժեշտ է մի գաղափար, որը ոչ միայն թույլ է տալիս արհեստական բանականությունը, այլև այն դարձնում է իր ռազմավարության մի մասը։ Նա համոզված է՝ արհեստական բանականության ոլորտում սեփական մշակումները կարող են դառնալ համակարգային խնդիրների լուծման գործիք, իսկ երևակայությունը՝ Հայաստանի տեխնոլոգիական վերելքի գլխավոր ռեսուրսը։