Երևանում ստորագրվել է փոխըմբռնման հուշագիր, որն ուղղված է Հայաստանում երեխաների առցանց անվտանգության բարձրացմանը և թվային գրագիտության զարգացմանը: Փաստաթուղթը ստորագրել են բարձր տեխնոլոգիական արդյունաբերության նախարար Մխիթար Հայրապետյանը, կրթության, գիտության, մշակույթի և սպորտի նախարար Ժաննա Անդրեասյանը և «Իզմիրլյան» բարեգործական հիմնադրամի տնօրեն Արմեն Չոբանյանը:
Մխիթար Հայրապետյանը նշել է, որ տեխնոլոգիաների արագ զարգացումը ոչ միայն նոր հնարավորություններ է բերում, այլև լուրջ ռիսկեր, հատկապես երեխաների համար: Նրա խոսքով՝ հուշագիրը առանցքային նշանակություն ունի անվտանգ թվային միջավայրի ձևավորման համար և ընդգծում է վաղ տարիքից կիբերգրագիտության, մեդիագրագիտության և կիբերհիգիենայի հիմնական կանոնների պահպանման համակարգված ուսուցման կարևորությունը:
Ժաննա Անդրեասյանը կիբերանվտանգությունը անվանել է ժամանակակից մարտահրավերներից մեկը և ընդգծել, որ պաշտպանված միջավայր կարելի է ապահովել միայն պետության, կրթական համակարգի և հասարակական կազմակերպությունների համատեղ աշխատանքի միջոցով: Հայաստանում ՅՈՒՆԻՍԵՖ-ի ներկայացուցիչ Քրիստինե Վայգանդը հավելել է, որ թվային տեխնոլոգիաները դարձել են երեխաների և դեռահասների կյանքի անբաժան մասը, ուստի առցանց միջավայրում պաշտպանությունը պահանջում է համապարփակ և երկարաժամկետ մոտեցում, որն ուղղված է անվտանգությանը և տեխնոլոգիաների գիտակցված օգտագործմանը: