2026 թվականին Հայաստանը դարձել է Հարավային Կովկասի ամենաթանկ երկիրը կենսապայմանների արժեքով։ Այս եզրակացությանն է եկել Numbeo կայք-ագրեգատորը՝ հրապարակելով թարմ վարկանիշը, որում հանրապետությունը զբաղեցրել է 87-րդ տեղն աշխարհում։ Համեմատության համար նշենք, որ Վրաստանը գտնվում է միայն 116-րդ հորիզոնականում, Ադրբեջանը՝ 122-րդ, Թուրքիան՝ 93-րդ, իսկ Ռուսաստանը՝ ցուցակի 104-րդ տողում։
Numbeo-ի վարկանիշը ձևավորվում է սննդի, ռեստորաններում սնվելու, տրանսպորտի և կոմունալ ծառայությունների ծախսերի վերլուծության հիման վրա, ընդ որում՝ բնակարանի վարձակալության և գնման արժեքը հաշվի է առնվում առանձին։ Այս մոտեցումը թույլ է տալիս գնահատել բնակիչների ամենօրյա ծախսերը՝ առանց կապվելու անշարժ գույքի շուկայի հետ, որը շատ երկրներում խիստ աղավաղում է ընդհանուր պատկերը։
Հետազոտության մեջ մեկնարկային կետ է ընդունվել Նյու Յորքը՝ 100% ինդեքսով։ Եթե քաղաքի կամ երկրի ինդեքսը կազմում է 120%, դա նշանակում է, որ այնտեղ ապրելը 20%-ով ավելի թանկ է, քան Նյու Յորքում։ Հայաստանի կենսապայմանների արժեքի ցուցանիշը կազմել է 40.9, ինչը ձևականորեն այն դարձնում է զգալիորեն ավելի էժան, քան ԱՄՆ-ի մեգապոլիսը, բայց միևնույն ժամանակ ավելի թանկ, քան տարածաշրջանի մոտակա բոլոր հարևանները։