Հայաստանի Ազգային ժողովի նախագահ Ալեն Սիմոնյանը հանդիպել է «Ռոսատոմի» գլխավոր տնօրեն Ալեքսեյ Լիխաչովի հետ և քննարկել ատոմային էներգետիկայի բնագավառում երկկողմ համագործակցության հարցերը։ Հանդիպումը տեղի է ունեցել Մոսկվայում Ալեն Սիմոնյանի ՌԴ պաշտոնական այցի շրջանակներում, հայտնել են ՀՀ ԱԺ մամուլի ծառայությունից։
Ավելի վաղ տարածքային կառավարման և ենթակառուցքների նախարար Դավիթ Խուդաթյանը հայտարարել էր, որ Հայաստանում նոր ատոմակայանը լինելու է մոդուլային տիպի, նախագծի վերաբերյալ վերջնական որոշումը նախատեսվում է կայացնել 2026-2027 թվականներին։ Հայկական կողմն արդեն քննարկում է «Ռոսատոմի» կողմից պատրաստված 1200 ՄՎտ հզորությամբ բլոկի կառուցման նախնական տեխնիկատնտեսական հիմնավորումը։
Հայկական ատոմակայանը, որը միակն է Հարավային Կովկասում, գտնվում է Մեծամորի մոտ՝ Երևանից 30 կմ հեռավորության վրա։ Ներկայումս կայանն ապահովում է երկրի էլեկտրաէներգիայի մինչև 40%-ը՝ մնալով արտադրության առանցքային աղբյուր։
