Մերձավոր Արևելքում հակամարտության սրումը և Հորմուզի նեղուցով նավարկության կրճատումը հանգեցրել են նավթի համաշխարհային գների կտրուկ աճի: Երկուշաբթի առավոտյան մեկ բարելի արժեքը թռիչք է գրանցել մոտ 26%-ով՝ գերազանցելով 119 դոլարը, ինչը 2022 թվականից ի վեր առավելագույն մակարդակն է:
Նավթի շուկան ավանդաբար սուր արձագանքում է աշխարհաքաղաքական ռիսկերին, հատկապես երբ դրանք ազդում են մատակարարման հիմնական երթուղիների վրա: Հորմուզի նեղուցով է անցնում նավթի և նավթամթերքի համաշխարհային արտահանման զգալի մասը, ուստի այս տարածաշրջանում նավերի երթևեկության ցանկացած սահմանափակում արագորեն արտացոլվում է գնանշումների և ներդրողների սպասումների վրա:
Տնտեսագետները նշում են, որ համաշխարհային գների աճը կարող է ազդել նաև Հայաստանի վրա։ Ըստ Հրանտ Միքայելյանի և Թաթուլ Մանասերյանի՝ նավթի թանկացումը կարող է հանգեցնել ներքին շուկայում վառելիքի գների բարձրացմանը, քանի որ երկիրը կախված է էներգակիրների ներկրումից։
Ճիշտ է, երեքշաբթի օրը նավթի գինն արդեն իջել է մինչև 85 դոլար:
