Հայաստանում սկսել են քննարկել ռազմավարական կարևոր նշանակություն ունեցող օբյեկտների, առաջին հերթին՝ էներգետիկայի կիբերանվտանգության ուժեղացման միջոցները։ Ուշադրության կենտրոնում են Հայաստանի էլեկտրական ցանցերը, որոնք ընտրվել են որպես պաշտպանության նոր չափանիշների ներդրման փորձնական հարթակ:
Նախաձեռնողը եղել է Բարձր տեխնոլոգիաների արդյունաբերության նախարարությունը, քննարկմանը միացել են գերատեսչությունների ներկայացուցիչները և ընկերության ղեկավարությունը։ Նախարար Մխիթար Հայրապետյանի խոսքով՝ էներգետիկ ենթակառուցվածքը չափազանց կարևոր է երկրի համար, ուստի դրա պաշտպանությունը կիբերսպառնալիքներից դառնում է առաջնահերթ խնդիր:
Նախագծի շրջանակներում նախատեսվում է զարգացնել ներքին կարողությունները, ներգրավել փորձագետներ և ներդնել պաշտպանության համալիր լուծումներ։ Հետագայում մշակված մոտեցումները կարող են տարածվել նաև այլ առանցքային ոլորտներում, որտեղ թվային հարձակումների նկատմամբ կայունությունը վճռորոշ դեր է խաղում: