Team Telecom Armenia ընկերությունը կապահովի Firebird AI լայնածավալ նախագծի հաղորդակցական և ինտերնետային ենթակառուցվածքը։ Կառուցվող տվյալների կենտրոնն արդեն նախապատրաստական վերջին փուլում է և գործարկվելուց հետո կդառնա տարածաշրջանի արհեստական բանականության խոշորագույն կենտրոնը։
Համալիրի աշխատանքի համար օպերատորը կտրամադրի նոր սերնդի մայրուղային օպտիկամանրաթելային ցանց՝ մինչև 1 Տբիթ/վրկ թողունակությամբ և հետագա ընդլայնման հնարավորությամբ։ Ընկերությունում նշել են, որ Հայաստանն արդեն միացված է միջազգային կապի ուղիներին չորս անկախ ուղղություններով, ինչը համապատասխանում է խոշոր տվյալների կենտրոնների կառուցման համաշխարհային պահանջներին։ Team Telecom Armenia-ի ենթակառուցվածքը կդառնա հիմնական տարրը, որը կկապի ապագա AI հարթակը գլոբալ թվային էկոհամակարգի հետ։
Առաջին փուլում Firebird նախագիծը կօգտագործի ավելի քան 6000 Nvidia Blackwell գրաֆիկական պրոցեսորներ, որոնք կապահովեն մինչև 110,6 էքսաֆլոպ հաշվողական հզորություն արհեստական բանականության խնդիրների համար։ Հետագայում նախատեսվում է հաշվողական ենթակառուցվածքի բազմակի ընդլայնում։ Օբյեկտի կառուցմանը մասնակցում են նաև Team խմբի մեջ մտնող Team Construct, Team Systems և Team Energy ընկերությունները։