Evocabank-ը նախատեսում է անցնել զարգացման նոր մոդելի, որտեղ արհեստական բանականությունը կդառնա բանկային պրոդուկտների ստեղծման և որոշումների կայացման հիմքը։ Mobile First ռազմավարության փոխարեն բանկը մտադիր է օգտագործել Intelligence First մոտեցումը, որտեղ AI-ը կաշխատի ոչ միայն բջջային հավելվածի ներսում, այլև ամբողջ ներքին ենթակառուցվածքում։
Ինչպես նշել է Evocabank-ի վարչության նախագահ Կարեն Եղիազարյանը, գլխավոր նպատակն է յուրաքանչյուր հաճախորդի համար ստեղծել անձնական ֆինանսական օգնական։ Նման համակարգը կկարողանա վերլուծել օգտատիրոջ սովորությունները, հաշվի առնել նրա կարիքները, առաջարկել խորհուրդներ և օգնել որոշումներ կայացնել՝ անկախ նրա միջոցների չափից՝ փոքր խնայողություններից մինչև խոշոր ակտիվներ։
Ներկայումս բանկն արդեն կիրառում է AI-ը խարդախության դեմ պայքարելու, տվյալների վերլուծության, ռիսկերի գնահատման, վարկային սքորինգի և բովանդակության պատրաստման համար։ Մոտ ապագայում Evocabank-ը նախատեսում է գործարկել սեփական AI Hub և առանձին ՏՏ ընկերություն, որը կզբաղվի AI-native պրոդուկտների մշակմամբ։ Նման լուծումների մի մասը ապագայում կարող է դուրս գալ միջազգային շուկաներ։ Ընդ որում, բանկում ընդգծում են, որ բարդ ֆինանսական որոշումները, ներառյալ խոշոր վարկերը և ոչ ստանդարտ իրավիճակները, դեռևս կմնան մասնագետների պատասխանատվության գոտում։