Հայաստանում նախատեսվում է կառուցել երկու ժամանակակից մաքսային-լոգիստիկ կենտրոն՝ Երևանում և Սյունիքում։ Ծրագրերի ընդհանուր արժեքը գնահատվում է 57 մլն եվրո։ Պետական եկամուտների կոմիտեն համաձայնագիր է ստորագրել CES Clean Energy Solutions GesmbH / iC consulenten LLC միջազգային խորհրդատուի հետ, որը կուղեկցի ծրագիրը շինարարության բոլոր փուլերում։

Նոր ենթակառուցվածքը պետք է համապատասխանի «կանաչ» շինարարության միջազգային չափանիշներին և ստանա LEED հավաստագիր։ Ծրագրի շրջանակներում մասնագետները կգնահատեն շենքերի էներգաարդյունավետությունը, ջրի սպառումը, վերականգնվող էներգիայի, բնական լուսավորության և էկոլոգիապես մաքուր շինանյութերի օգտագործման հնարավորությունը։ Ուշադրություն կդարձվի նաև ներքին միջավայրի որակին, թափոնների վերամշակմանը և կրճատմանը։

Խորհրդատուն կօգնի ճշգրտել նախագծային և շինարարական լուծումները՝ համաձայն LEED պահանջների և կուղեկցի հավաստագրման գործընթացը։ Երկու մաքսային-լոգիստիկ կենտրոնների համար նախատեսվում է ստանալ LEED Silver մակարդակից ոչ ցածր հավաստագիր։