Հայաստանը և Ղազախստանը կարող են դառնալ արհեստական ինտելեկտի զարգացման տարածաշրջանային կենտրոններ՝ անհրաժեշտ հաշվողական և տեխնոլոգիական բազա ստեղծելու դեպքում։ Այս մասին հայտարարել է NVIDIA-ի փոխնախագահ Rev Lebaredian-ը Աստանայում կայացած «AI&DIGITAL BRIDGE» միջազգային տեխնոլոգիական ֆորումի ժամանակ։ Նրա խոսքով՝ NVIDIA-ի աջակցությամբ երկու երկրները կարող են միավորել մասնագետներին, ընդլայնել հաշվողական ռեսուրսների հասանելիությունը և ձևավորել միջավայր համաշխարհային շուկա ուղղված ընկերությունների համար։
Lebaredian-ը նշել է, որ արհեստական ինտելեկտը տնտեսական աճի աղբյուրի վերածելը պահանջում է մի քանի բաղադրիչների համադրություն։ Խոսքը հաշվողական ենթակառուցվածքների, դրա հետ աշխատելու ունակ մասնագետների և նոր տեխնոլոգիական նախագծեր ստեղծող ձեռնարկատերերի մասին է։ NVIDIA-ի ներկայացուցչի կարծիքով՝ հենց այս ռեսուրսների միավորումն է թույլ տալիս փոքր թիմերին մշակել ապրանքներ համաշխարհային շուկայի համար։
NVIDIA-ի փոխնախագահը նաև AI-ի ենթակառուցվածքների զարգացումը կապել է գոյություն ունեցող ճյուղերի արտադրողականության բարձրացման և բիզնեսի նոր ուղղությունների առաջացման հետ։ Հայաստանի և Ղազախստանի դեպքում, նրա խոսքով, նման էկոհամակարգի ստեղծումը կարող է պայմաններ ապահովել տաղանդների կենտրոնացման, հաշվողական հնարավորությունների ընդլայնման և տեխնոլոգիական ընկերությունների գործարկման համար, որոնք աշխատում են ոչ միայն ներքին, այլև միջազգային շուկաների համար։