Առաջին միջազգային NVB Frontier Forum-ը տեղի է ունեցել հոկտեմբերի 1-ին Երևանում՝ New Venture Brokerage-ի նախաձեռնությամբ։ Փակ միջոցառմանը մասնակցել են ներդրողներ, տեխնոլոգիական ընկերությունների ղեկավարներ, բիզնեսի հիմնադիրներ և ոլորտի փորձագետներ։ Հիմնական թեմաներն էին տիեզերական տեխնոլոգիաները, արհեստական բանականությունը, անհրաժեշտ ենթակառուցվածքների զարգացումը և հեռանկարային ոլորտներում մասնավոր կապիտալ ներգրավելու հնարավորությունները։
Տիեզերական տնտեսության քննարկման ընթացքում Manifest Space-ի գլխավոր տնօրեն Նիկ Օրենշտեյնը նշել է, որ ոլորտը աստիճանաբար պետական ծրագրերից անցնում է առևտրային նախագծերի։ Սա ներդրողներին հնարավորություն է տալիս մուտք գործել միջազգային շուկաներում գործող ընկերություններ։ Տիեզերական տեխնոլոգիաների ոլորտում իրենց փորձով կիսվել են նաև EOS Space Technology-ի և GEN Space-ի ղեկավարները։ Առանձին քննարկում է նվիրվել AI ենթակառուցվածքին, ներառյալ GPU-ի վրա հիմնված հաշվողական հզորությունները և համապատասխան լուծումների մշակման մեջ ներդրումները։ Մասնակիցների թվում էին NVIDIA-ի, Firebird-ի և Eleveight AI-ի ներկայացուցիչները։
Մեկ այլ թեմա էր Հայաստանի զարգացումը որպես միջազգային տեխնոլոգիական և ներդրումային կենտրոն։ New Venture Brokerage-ի տնօրեն Մարիաննա Մովսեսյանն ընդգծել է ընկերությունների հիմնադիրների, ներդրումային հիմնադրամների և ենթակառուցվածքային նախագծերի մասնագետների հետ ուղիղ շփումների կարևորությունը։ Նրա խոսքով՝ նման կապերը թույլ են տալիս տեղեկատվություն ստանալ անմիջապես շուկայի մասնակիցներից և ավելի լավ գնահատել ոլորտների հեռանկարները։ Կազմակերպիչները ֆորումը դիրքավորել են որպես գործնական փորձի փոխանակման և նոր ներդրումային հնարավորությունների քննարկման հարթակ։
