TUMO ստեղծարար տեխնոլոգիաների կենտրոնը կընդլայնի կրթական ցանցը Գյումրիում. Մուշ թաղամասում կտեղադրվի նոր TUMO Box, որտեղ 12-ից 18 տարեկան դեռահասները կկարողանան ինքնուրույն յուրացնել ժամանակակից տեխնոլոգիաները և կատարել ուսումնական առաջադրանքներ։ Գործնական պարապմունքները մասնակիցները կանցկացնեն TUMO հիմնական կենտրոնում, որը քաղաքում գործում է 2015 թվականից։
Ծրագիրն ամրագրված է «Հայաստան» համահայկական հիմնադրամի և TUMO-ի միջև համագործակցության հուշագրով։ Փաստաթուղթը ստորագրել են հիմնադրամի գործադիր տնօրեն Արամայիս Ավետիսյանը և TUMO-ի ղեկավար Մարի Լու Պապազյանը։ Նրա խոսքով՝ համագործակցությունը թույլ կտա տեխնոլոգիական կրթությունն ավելի մատչելի դարձնել ավելի շատ դեռահասների համար, այդ թվում՝ մարզային համայնքներում։
Կողմերը նաև մտադիր են զարգացնել կրթական հնարավորությունները Հայաստանի մարզերում, ուսումնական ծրագրերը ներառել համայնքների զարգացման ծրագրերում և նախաձեռնություններին ներգրավել գործընկերների ինչպես երկրից, այնպես էլ հայկական սփյուռքից։
