Երևանում մեկնարկել է Silicon Mountains երկօրյա տեխնոլոգիական ֆորումը, որի նպատակն է ներդրողներին ցուցադրել Հայաստանի հնարավորությունները բարձր տեխնոլոգիաների ոլորտում: Միջոցառման ընթացքում քննարկվում են տեղական ոլորտի զարգացման հեռանկարները և երկրի ներուժը նոր նախագծերի ու միջազգային գործընկերների ներգրավման համար: Կազմակերպիչն է Հայաստանի ՏՏ և հեռահաղորդակցության գործատուների միությունը:
Բարձր տեխնոլոգիական արդյունաբերության նախարար Դավիթ Թադևոսյանը բացմանը հայտարարեց, որ Հայաստանը կարող է հարթակ դառնալ տեխնոլոգիական ընկերությունների՝ տեղեկատվական տեխնոլոգիաների և միկրոէլեկտրոնիկայի համաշխարհային շուկաներ դուրս գալու համար: Նրա խոսքով՝ երկիրն ունի հնարավորություններ այս ուղղությունները զարգացնելու և միջազգային տեխնոլոգիական ոլորտում իր դիրքերն ամրապնդելու համար:
Թադևոսյանը նաև ընդգծեց, որ արագ փոփոխությունների պայմաններում ընկերությունների հաջողությունը կախված է նոր տեխնոլոգիաների մշակման արագությունից և շուկայի պահանջներին օպերատիվորեն հարմարվելու կարողությունից: Silicon Mountains ֆորումը կոչված է դառնալու հարթակ այս խնդիրները քննարկելու, հայկական տեխնոլոգիական էկոհամակարգի ներուժը ցուցադրելու և ներդրողների ուշադրությունը գրավելու համար: