Հայաստանում առաջիկա յոթ տարիների ընթացքում նախատեսվում է առնվազն $14 մլն ներդնել ֆիզիկական արհեստական բանականության զարգացման գործում: Ծրագիրն իրականացվելու է պետություն-մասնավոր գործընկերության պայմաններով. միջոցների կեսը կտրամադրի պետությունը, մյուս կեսը՝ մասնավոր ներդրողները: Համապատասխան որոշումը հավանության է արժանացել երկրի կառավարության կողմից:
Ծրագիրը նախատեսում է ռոբոտատեխնիկայի և արհեստական բանականության հատման կետում միջազգային մակարդակի գիտակրթական բազայի ստեղծում: Ծրագրին կմասնակցեն Երևանի պետական համալսարանը, Հայաստանի ազգային պոլիտեխնիկական համալսարանը և Հայաստանի ամերիկյան համալսարանը՝ «Ba-GIN գիտությունների և արհեստական բանականության կենտրոն» հիմնադրամի հետ համատեղ: Նախատեսվում է երկարաժամկետ հիմունքներով ներգրավել առնվազն երեք առաջատար գիտնականի, ավելի քան 12 հետդոկտորանտի և 60-ից ավելի հրավիրյալ հետազոտողի: Միաժամանակ կաշխատեն 15 մասնագետներից բաղկացած գիտական թիմեր:
Նախատեսված է նաև Ազգային պոլիտեխնիկական համալսարանի ինտելեկտուալ համակարգերի և առաջադեմ կառավարման լաբորատորիայի արդիականացում՝ այն վերածելով ֆիզիկական ԱԲ-ի հետազոտությունների կենտրոնի: Բացի այդ, կբացվի ևս մեկ լաբորատորիա: Առաջին տարում պետությունը ծրագրին կուղղի 168,4 մլն դրամ, որի հիմնական մասը կուղղվի գիտնականների աշխատանքի վարձատրությանը: