«Տաթևի թևեր» ճոպանուղին կրկին ճանաչվել է աշխարհի լավագույնը. նախագիծն արդեն չորրորդ անգամ արժանացել է World Travel Awards հեղինակավոր միջազգային մրցանակին՝ հաղթելով «Աշխարհի լավագույն ճոպանուղի» անվանակարգում։ Հայկական երթուղին առաջ է անցել Բրազիլիայի, Բոլիվիայի, Վիետնամի, Կանադայի, ԱՄՆ-ի, Հարավային Աֆրիկայի և Նոր Զելանդիայի մրցակիցներից:
Քվեարկության արդյունքները հայտարարվել են Բահրեյնում մրցանակաբաշխության հանդիսավոր արարողության ժամանակ։ Ավելի վաղ «Տաթևի թևերը» արդեն հաղթել էր այս անվանակարգում՝ 2024, 2023 և 2021 թվականներին։ 2025 թվականին ճոպանուղին դարձավ 15 տարեկան, և այն վաղուց դարձել է հայկական զբոսաշրջության այցեքարտը։ Բացման պահից երթուղին նոր կյանք է հաղորդել Սյունիքի մարզին՝ այն վերածելով ճանապարհորդների համար ձգողականության կետի։ Տարածաշրջան զբոսաշրջային հոսքը 15 տարում աճել է 17 անգամ, և այսօր Հայաստան ժամանող զբոսաշրջիկների հինգերորդ մասն այցելում է հենց այստեղ:
Ռուբեն Վարդանյանի և Վերոնիկա Զոնաբենդի նախաձեռնությամբ «Տաթևի վերածնունդ» ծրագրի շրջանակներում կառուցված «Տաթևի թևերը» գրանցվել են Գինեսի ռեկորդների գրքում որպես աշխարհի ամենաերկար հետադարձելի ճոպանուղի. դրա երկարությունը կազմում է 5752 մետր։ Նախագիծը դարձել է մշակութային ժառանգության պահպանման կարևոր մաս. ամբողջ եկամուտն ուղղվում է Տաթևի վանքի վերականգնմանը և Տաթև համայնքի զարգացմանը:
World Travel Awards մրցանակը անվանում են «զբոսաշրջային Օսկար». այն նշում է ճանապարհորդության և հյուրընկալության ոլորտի ամենաակնառու նախաձեռնությունները՝ պարգևատրելով այն նախագծերը, որոնք ցույց են տալիս սպասարկման բարձր մակարդակ, նորարարություն և ներդրում ուղղության զարգացման գործում:
