Եվրասիական տնտեսական միության երկրների կառավարությունների ղեկավարները սահմանել են ապրանքների թվային մակնշման համակարգի զարգացման հետագա ուղղությունները։ Հիշեցնենք, որ Հայաստանը 2015 թվականից հանդիսանում է Եվրասիական տնտեսական միության (ԵԱՏՄ) լիիրավ անդամ՝ Ռուսաստանի, Բելառուսի, Ղազախստանի և Ղրղզստանի հետ միասին։
Եվրասիական տնտեսական հանձնաժողովից հայտնել են, որ համապատասխան հարցը քննարկվել է Եվրասիական միջկառավարական խորհրդի նիստում։ Խոսքը ԵԱՏՄ տարածքում արդեն գործող արտադրանքի նույնականացման համակարգի էվոլյուցիայի հաջորդ փուլի մասին է։
Հաշվի առնելով 2025 թվականի հունիսին միության առաջնորդների գագաթնաժողովում ձեռք բերված պայմանավորվածությունները՝ նշվել են առանցքային առաջնահերթությունները։ Դրանց թվում են՝ ԵՏՀ տեղեկատվական հարթակի հիման վրա մակնշման համակարգի ինտեգրումը և դրա տեխնոլոգիական զարգացումը, ինչպես նաև ազգային վերահսկողական համակարգերի հետ համադրման շնորհիվ ապրանքների օրինականության և անվտանգության նկատմամբ վերահսկողության ուժեղացումը։ Առանձին ուշադրություն է դարձվել մեխանիզմների մշակմանը, որոնք ապահովում են մակնշված արտադրանքի ազատ տեղաշարժը ԵԱՏՄ ներսում։
Նախատեսվում է նաև արդիականացնել միության տեղեկատվական համակարգերը, որոնց միջոցով իրականացվում է մակնշված ապրանքների վերաբերյալ տվյալների փոխանակումը, ներառյալ կոդերի պատվիրման և տրամադրման գործընթացները։ ԵՏՀ առևտրի հարցերով նախարար Անդրեյ Սլեպնևի խոսքով, մակնշման համակարգն ընդհանուր առմամբ արդեն ձևավորվել է, իսկ հաջորդ քայլը կլինի դրա արդյունավետության բարձրացումը կեղծիքների դեմ պայքարում՝ շեշտը դնելով ապրանքների անվտանգության և օրինականության վերահսկողության վրա դրանց շրջանառության մեջ մտնելիս։