Երևանում կայացել է «Բարձր տեխնոլոգիաներ և տնտեսություն. Հայաստանի ապագայի քննարկում» խորագրով պանելային քննարկումը, որը կազմակերպել էր Yandex Armenia-ն։ Մասնակիցները քննարկել են Բարձր տեխնոլոգիական արդյունաբերության նախարարության կողմից մշակվող բարձր տեխնոլոգիաների զարգացման ռազմավարական պլանը, ինչպես նաև երկրի հեռանկարները համաշխարհային տեխնոլոգիական միտումների համատեքստում:
Հանդիպմանը ներկա են եղել փոխնախարար Ռուբեն Սիմոնյանը, «Ամերիա» ՓԲԸ խորհրդատվական ծառայության ղեկավար Տիգրան Ջրբաշյանը և միջազգայնորեն ճանաչված տնտեսագետ Ռուբեն Ենիկոլոպովը։ Փորձագետները նշել են Հայաստանի՝ որպես R&D տարածաշրջանային հաբ դառնալու ներուժը և ընդգծել պետության, մասնավոր հատվածի և տեխնոլոգիական համայնքի համատեղ աշխատանքի անհրաժեշտությունը։ Հատուկ ուշադրություն է դարձվել սփյուռքի դերին՝ որպես գիտելիքի, ներդրումների և գործարար կապերի աղբյուր:
Մասնակիցները քննարկել են նաև մարդկային կապիտալի զարգացման առաջնահերթությունը և տեխնոլոգիաների գործնական ներդրումը, ներառյալ արհեստական ինտելեկտի վրա հիմնված լուծումները, տնտեսության այլ ոլորտների խթանման համար: Քննարկման մոդերատոր, Yandex Armenia-ի պետական կապերի գծով տնօրեն Տիգրան Գասպարյանն ընդգծել է ընկերության պատրաստակամությունը՝ աջակցել նման նախաձեռնություններին և ստեղծել հարթակներ երկրի տեխնոլոգիական զարգացման քննարկման համար:
