2018 թվականից ի վեր Հայաստանում տեղեկատվական տեխնոլոգիաների ոլորտի ընկերությունների թիվն աճել է 1225%-ով կամ ավելի քան 12 անգամ, հայտարարել է վարչապետ Նիկոլ Փաշինյանը ՏՏ, արհեստական բանականության և հեռահաղորդակցության ներկայացուցիչների հետ հանդիպմանը։ Այս ընթացքում ոլորտի դրամական շրջանառությունն աճել է 171%-ով, համախառն հասույթը՝ գրեթե չորս անգամ, իսկ աշխատակիցների թիվը՝ ավելի քան հինգ անգամ։
Փաշինյանը ընդգծել է, որ ոլորտի զարգացումը չի սահմանափակվում թվերով. այսօր արբանյակային ինտերնետը հասանելի է ամբողջ Հայաստանում, ներառյալ Starlink ծառայությունները, ինչը նպաստում է տարածաշրջանների համաչափ թվային զարգացմանը։ Վերջերս Երևանի պետական համալսարանում գործարկվել է նաև առաջին պետական գերհամակարգիչը, որը նոր հնարավորություններ է բացում հետազոտությունների և տեխնոլոգիաների համար։
Ռազմավարական զարգացման համատեքստում վարչապետը նշել է հայ-ամերիկյան TRIPP նախագիծը, որն ուղղված է սահմանային և մաքսային հսկողության մեջ բարձր տեխնոլոգիաների ներդրմանը։ Նախատեսվում է այս տեխնոլոգիաների կիրառումը բոլոր անցակետերում, այդ թվում՝ «Զվարթնոց» օդանավակայանում, ինչպես նաև կենսաչափական անձնագրերի համակարգի ներդրումը՝ անվտանգության և արդյունավետության բարձրացման համար։
