Turkish Airlines ավիաընկերությունը սկսել է կանոնավոր չվերթներ իրականացնել Ստամբուլ-Երևան-Ստամբուլ երթուղով։ Առաջին ինքնաթիռը ժամանել է «Զվարթնոց» միջազգային օդանավակայան Ստամբուլի օդանավակայանից, հայտնում են երևանյան օդային նավահանգստի մամուլի ծառայությունից։
Մեկնարկային չվերթի դիմավորմանը մասնակցել են ավիացիոն և պետական կառույցների ներկայացուցիչներ։ Նրանց թվում են Հայաստանի Քաղաքացիական ավիացիայի կոմիտեի նախագահի տեղակալ Ստեփան Փայասլյանը, «Արմենիա» միջազգային օդանավակայաններ» ընկերության տնօրեն Մարսելո Վենդեն, ինչպես նաև ավիաընկերության ներկայացուցիչները՝ Արևելյան Եվրոպայում վաճառքի գծով փոխնախագահ Հուսեին Օզբեկը և Վրաստանի և Հայաստանի տարածաշրջանային տնօրեն Քենան Ինջեն։
Առաջին փուլում Ստամբուլ-Երևան-Ստամբուլ երթուղով թռիչքները կիրականացվեն ամեն օր։ Մայիսի 14-ից հաճախականությունը կավելացվի մինչև շաբաթական 10 չվերթ, իսկ հունիսի 15-ից՝ մինչև 14 չվերթ։ Սա թույլ կտա զգալիորեն ընդլայնել տրանսպորտային կապը Երևանի և Ստամբուլի միջև։
