Հայաստանի կառավարությունը Firebird AI-ից կգնի 25 միլիոն դոլարի բարձր արտադրողականության հաշվողական հզորություններ՝ 5 տարի ժամկետով։ Խոսքը արհեստական ինտելեկտի ռեսուրսների մասին է, որոնք կօգտագործվեն, այդ թվում, Հրազդանում կառուցվող տվյալների մշակման կենտրոնում:
Ինչպես հայտնել է նախարար Մխիթար Հայրապետյանը, ծրագիրն ուղղված է ստարտափներին, հետազոտական թիմերին, կրթական հաստատություններին և առանձին մասնագետներին աջակցելուն։ Նրանք հասանելիություն կունենան ենթակառուցվածքներին՝ AI համակարգերի մշակման, ուսուցման և ներդրման համար:
Ռեսուրսների բաշխումը տեղի կունենա Artificial Intelligence Virtual Institute (AIVI) հարթակի միջոցով, որը կդառնա հայտեր ներկայացնելու և մասնակիցների հետ շփվելու միասնական պատուհան։ Իշխանությունները ակնկալում են, որ նախաձեռնությունը կարագացնի տեղական AI էկոհամակարգի զարգացումը և կամրապնդի երկրի դիրքերը բարձր տեխնոլոգիաների ոլորտում:
