Green Rock-ը դարձել է International Architecture & Design Awards 2026 միջազգային մրցանակի դափնեկիր՝ ստանալով ոսկե մրցանակ Դիլիջանում բազմաֆունկցիոնալ համալիրի նախագծի համար։ Մրցույթին մասնակցել են 53 երկրների աշխատանքներ, իսկ եզրափակիչ ցուցակում ընդգրկվել է ավելի քան 500 նախագիծ, որոնք գնահատվել են ճարտարապետների և դիզայներների միջազգային ժյուրիի կողմից։
Նշված Dilijan Multifunctional Complex նախագիծը իրականացնում է «քաղաք քաղաքում» հայեցակարգը։ Այն ներառում է 210 սենյականոց հյուրանոց, 600 տեղանոց համերգասրահ, հյուրընկալության դպրոց, կրթական տարածքներ, սրճարաններ, այգի, կինոթատրոն և համատեղ աշխատանքի տարածքներ։ Համալիրը նախատեսված է շուրջտարյա աշխատանքի համար և պետք է կրճատի զբոսաշրջային հոսքի սեզոնային տատանումները՝ միաժամանակ ստեղծելով աշխատատեղեր։
Նախագծի ճարտարապետությունը հաշվի է առնում բնական սահմանափակումները. կիրառվել է տեռասային կառուցապատում՝ լանդշաֆտին նվազագույն միջամտությամբ և տեղական նյութերի օգտագործմամբ։ EDGE ստանդարտի գնահատմամբ՝ հանրային տարածքը կապահովի էներգիայի մոտ 35% խնայողություն, ջրի 30% խնայողություն և ածխածնի հետքի 39% կրճատում, ինչը այն դարձնում է տարածաշրջանի ամենաէկոլոգիական նախագծերից մեկը։
