ԱՄԷ Emarat ազգային նավթային ընկերությունը Երևանում բացել է իր առաջին ֆիրմային բենզալցակայանը։ Սա ընկերության առաջին քայլն է Հայաստանի շուկա մուտք գործելու և Արաբական Միացյալ Էմիրությունների սահմաններից դուրս միջազգային ընդլայնման ռազմավարության մասն է։
Ծրագիրն իրականացվել է Mega Trade ընկերության հետ համագործակցությամբ, որը SIL Capital-ի ներդրումային պորտֆելի մաս է կազմում։
Emarat-ը հայտարարել է, որ առաջին բենզալցակայանի գործարկումը մեկնարկային կետ կդառնա ամբողջ երկրում բենզալցակայանների ցանցի ձևավորման համար։ Առաջին փուլում ընկերությունը նախատեսում է կառուցել մոտ 35 օբյեկտ Հայաստանի տարբեր մարզերում, իսկ ներդրումների ընդհանուր ծավալը գնահատվում է 35-40 միլիոն դոլար։
Emarat-ը նշում է, որ մտադիր է հայկական շուկայում ներդնել վառելիքի որակի, սպասարկման և հաճախորդների փորձի իր սեփական ստանդարտները։
Ավելի վաղ Հայաստանում արդեն սկսել էին գործել Shell և Gulf միջազգային ապրանքանիշերի լցակայանները։
