Team Telecom Armenia-ն հայտարարել է ղեկավարության փոփոխության մասին՝ կապված բիզնեսի ընդլայնման և խմբի նոր շուկաներ մուտք գործելու հետ։ Օգոստոսի 24-ից ընկերության գլխավոր տնօրեն է նշանակվել Արամ Բարսեղյանը, ով նախկինում զբաղեցնում էր գլխավոր տնօրենի տեղակալի պաշտոնը և ընդգրկված էր տնօրենների խորհրդի կազմում։
Հայկ Եսայանը՝ Team Telecom Armenia-ի համահիմնադիրը և նախկին ղեկավարը, այժմ կկենտրոնանա Team Group-ի կառավարման, դրա ռազմավարական զարգացման և միջազգային ներկայության ընդլայնման վրա։
Team-ում նշում են, որ խումբն արդեն միավորում է ավելի քան 15 ընկերություն և մոտ 2800 աշխատակից, որոնք աշխատում են չորս երկրներում։ Բացի հեռահաղորդակցությունից, բիզնեսը ներառում է էներգետիկա, էլեկտրական մեքենաների լիցքավորման ենթակառուցվածք, շինարարություն, տեխնոլոգիաներ, ֆինանսներ, էլեկտրոնային առևտուր, լոգիստիկա և հյուրանոցային ոլորտ։
Բարսեղյանը հեռահաղորդակցության ոլորտում աշխատում է ավելի քան 20 տարի և եղել է Team-ի առանցքային ղեկավարներից մեկը ընկերության հիմնադրման օրվանից։
